Gyaandweep | Mahabharatam - आदि पर्व

सूत उवाच॥

एतत्ते सर्वमाख्यातममृतं मथितं यथा । यत्र सोऽश्वः समुत्पन्नः श्रीमानतुलविक्रमः ॥१॥

etatte sarvamākhyātamamṛtaṃ mathitaṃ yathā |yatra so'śvaḥ samutpannaḥ śrīmānatulavikramaḥ ||1||

यं निशाम्य तदा कद्रूर्विनतामिदमब्रवीत् । उच्चैःश्रवा नु किंवर्णो भद्रे जानीहि माचिरम् ॥२॥

yaṃ niśāmya tadā kadrūrvinatāmidamabravīt |uccaiḥśravā nu kiṃvarṇo bhadre jānīhi māciram ||2||

विनतोवाच॥

श्वेत एवाश्वराजोऽयं किं वा त्वं मन्यसे शुभे । ब्रूहि वर्णं त्वमप्यस्य ततोऽत्र विपणावहे ॥३॥

śveta evāśvarājo'yaṃ kiṃ vā tvaṃ manyase śubhe |brūhi varṇaṃ tvamapyasya tato'tra vipaṇāvahe ||3||

कद्रूरुवाच॥

कृष्णवालमहं मन्ये हयमेनं शुचिस्मिते । एहि सार्धं मया दीव्य दासीभावाय भामिनि ॥४॥

kṛṣṇavālamahaṃ manye hayamenaṃ śucismite |ehi sārdhaṃ mayā dīvya dāsībhāvāya bhāmini ||4||

सूत उवाच॥

एवं ते समयं कृत्वा दासीभावाय वै मिथः । जग्मतुः स्वगृहानेव श्वो द्रक्ष्याव इति स्म ह ॥५॥

evaṃ te samayaṃ kṛtvā dāsībhāvāya vai mithaḥ |jagmatuḥ svagṛhāneva śvo drakṣyāva iti sma ha ||5||

ततः पुत्रसहस्रं तु कद्रूर्जिह्मं चिकीर्षती । आज्ञापयामास तदा वाला भूत्वाञ्जनप्रभाः ॥६॥

tataḥ putrasahasraṃ tu kadrūrjihmaṃ cikīrṣatī |ājñāpayāmāsa tadā vālā bhūtvāñjanaprabhāḥ ||6||

आविशध्वं हयं क्षिप्रं दासी न स्यामहं यथा । तद्वाक्यं नान्वपद्यन्त ताञ्शशाप भुजङ्गमान् ॥७॥

āviśadhvaṃ hayaṃ kṣipraṃ dāsī na syāmahaṃ yathā |tadvākyaṃ nānvapadyanta tāñśaśāpa bhujaṅgamān ||7||

सर्पसत्रे वर्तमाने पावको वः प्रधक्ष्यति । जनमेजयस्य राजर्षेः पाण्डवेयस्य धीमतः ॥८॥

sarpasatre vartamāne pāvako vaḥ pradhakṣyati |janamejayasya rājarṣeḥ pāṇḍaveyasya dhīmataḥ ||8||

शापमेनं तु शुश्राव स्वयमेव पितामहः । अतिक्रूरं समुद्दिष्टं कद्र्वा दैवादतीव हि ॥९॥

śāpamenaṃ tu śuśrāva svayameva pitāmahaḥ |atikrūraṃ samuddiṣṭaṃ kadrvā daivādatīva hi ||9||

सार्धं देवगणैः सर्वैर्वाचं तामन्वमोदत । बहुत्वं प्रेक्ष्य सर्पाणां प्रजानां हितकाम्यया ॥१०॥

sārdhaṃ devagaṇaiḥ sarvairvācaṃ tāmanvamodata |bahutvaṃ prekṣya sarpāṇāṃ prajānāṃ hitakāmyayā ||10||

तिग्मवीर्यविषा ह्येते दन्दशूका महाबलाः । तेषां तीक्ष्णविषत्वाद्धि प्रजानां च हिताय वै ॥११॥ ( प्रादाद्विषहणीं विद्यां काश्यपाय महात्मने ॥११॥ )

tigmavīryaviṣā hyete dandaśūkā mahābalāḥ |teṣāṃ tīkṣṇaviṣatvāddhi prajānāṃ ca hitāya vai ||11|| ( prādādviṣahaṇīṃ vidyāṃ kāśyapāya mahātmane ||11|| )

Languages